As familias do alumnado de 1º do CEP Altamira de Salceda de Caselas reclaman á Consellería de Educación que se concedan catro unidades no nivel, en lugar das tres actualmente previstas, para garantir unhas ratios axeitadas e unha atención educativa de calidade.
Consideran que a organización en tres aulas para as 73 prazas matriculadas incrementa innecesariamente a ratio e dificulta a atención individualizada, especialmente ante as necesidades de diversidade e apoio do centro. A situación agrávase ao saber que para o vindeiro curso xa está prevista unha organización en catro aulas, o que supón un agravio comparativo para o alumnado actual.
“"Non entendemos que este curso se nos diga que tres aulas son suficientes e que o vindeiro curso si se contemple a cuarta. O alumnado non pode recibir un trato diferente en función do ano no que lle corresponda estar escolarizado. Non estamos pedindo un privilexio: estamos pedindo que se aplique o mesmo criterio e que o alumnado deste curso non sexa prexudicado fronte ao do seguinte."
Solicitan á Xunta que revise a decisión, tendo en conta non só criterios numéricos, senón tamén os principios de equidade, igualdade de oportunidades e calidade educativa. Por este motivo, presentaron un escrito ante a Inspección de Educación.
O equipo de goberno do Concello de Salceda manifestou o seu apoio á reclamación, consciente de que as diferentes necesidades do alumnado requiren unha atención máis directa que non se garante coas tres aulas actuais.
