O monopraza UM26 da escudaría universitaria UVigo Motorsport xa se atopa de camiño a Austria para comezar este domingo a tempada de Formula Student no circuíto Red Bull Ring, en Spielberg. A expedición, composta por 28 membros do equipo, chegará ao circuíto o propio domingo, o mesmo día que o coche, que partiu de Vigo nun camión xunto con todo o equipamento o pasado día 22.
Dende a súa presentación o pasado día 7, o equipo continuou coa posta a punto do UM26, pulindo pequenos detalles detectados nos test realizados nas últimas semanas. Estas probas leváronse a cabo tanto nos aparcamentos da EE Industrial e da Facultade de Filoloxía e Tradución como nas instalacións dun dos patrocinadores, o CTAG, segundo detalla Marta Cabo, team leader do equipo.
A competición austríaca, que comeza este domingo e rematará o xoves 30, reunirá a 57 equipos de diferentes universidades europeas. Os primeiros días estarán dedicados ás probas estáticas, como as de deseño de enxeñaría, análise de custes ou plan de negocios, ademais das inspeccións técnicas. Os dous últimos días terán lugar as probas dinámicas en pista.
O equipo despraza a Austria catro pilotos oficiais e un de reserva: Diego Gándara Dacal, David Conde Varela, Yago del Rio Comesaña, Diego Barreiro Delgado e Javier Valiñas Canedo. A escudaría afronta esta primeira proba co obxectivo de superar as inspeccións técnicas e correr co monopraza, confiando na súa competitividade malia a forte competencia.
O UM26 é un monopraza máis lixeiro, cun novo motor e sistemas de propulsión e aerodinámica renovados. Os cambios máis importantes respecto do seu antecesor, o UM25, inclúen unha redución de peso estimada de arredor de 25kg, o cambio de motor dun Kawasaki ER6N a un Triumph Daytona, e o redeseño dos sistemas de propulsión e do paquete aerodinámico. O combustible empregado é etanol.
A seguinte cita da escudaría será a Formula Student Spain en Barcelona, no circuíto de Montmeló, entre o 1 e 7 de agosto, onde competirán con outros 66 equipos.
