O Instituto de Investigacións Mariñas (IIM-CSIC), a través do seu grupo de Ecoloxía e Biodiversidade Mariña (Ecobiomar), xunto con AFAMO (Asociación de Familiares de Persoas con Alzhéimer e outras Demencias do Morrazo), levou a cabo o pasado 30 de setembro en Vigo o obradoiro «A pegada dos peixes». Esta iniciativa, enmarcada nun convenio de colaboración, busca achegar a investigación mariña á sociedade dunha maneira creativa e participativa.
A actividade utilizou o gyotaku, unha técnica artística xaponesa de impresión de peixes, como punto de partida. As persoas usuarias de AFAMO descubriron curiosidades sobre a anatomía de rodaballos e experimentaron coa técnica para crear as súas propias composicións artísticas en bolsas de tea, demostrando a súa creatividade.
Esta colaboración subliña o compromiso da ciencia pública co progreso social, non só a través de avances científicos senón tamén mediante iniciativas de divulgación que crean espazos de encontro e achegan a investigación a colectivos diversos. AFAMO, que traballa na mellora da calidade de vida de persoas con demencia e as súas familias, atopa nesta alianza novas experiencias que estimulan as capacidades dos usuarios e promoven o seu benestar.
A través do diálogo entre ciencia e arte, o obradoiro ofreceu unha perspectiva diferente para descubrir a biodiversidade mariña, adaptándose a diferentes públicos e realidades. Ponse así en valor a implicación dos investigadores e o seu compromiso por estender o coñecemento máis alá do ámbito estritamente científico, contribuíndo ao benestar colectivo.
