O Instituto de Investigacións Mariñas (IIM-CSIC) tivo unha destacada presenza no XXVIII Foro dos Recursos Mariños e da Acuicultura das Rías Galegas (ForoAcui), celebrado os días 1 e 2 de outubro no Grove. A participación do instituto culminou co recoñecemento ao mellor panel, outorgado a un traballo centrado no desenvolvemento dunha acuicultura máis sostible e preparada para o cambio climático.
O traballo premiado, titulado «Hacia una acuicultura gallega más sostenible y preparada para el cambio climático: Acondicionamiento térmico de Saccharina latissima y su aplicación en sistemas de Acuicultura Multi-Trófica Integrada», recibiu o primeiro premio do ForoAcui, dotado con 250 euros. Entre os seus autores figuran os investigadores do IIM-CSIC Gonzalo del Olmo, Jorge C. Santamaría e José Pintado, xunto con investigadores doutras institucións.
Esta investigación explora o potencial da macroalga Saccharina latissima para mellorar a sostibilidade e resiliencia da acuicultura fronte ao cambio climático. O estudo céntrase no acondicionamento térmico desta especie e a súa aplicación en sistemas de acuicultura multitrófica integrada, onde as algas axudan na retirada de nutrientes e na xeración de biomasa.
A contribución do IIM-CSIC ao ForoAcui tamén se manifestou na conferencia inaugural, impartida por Antonio Figueras Huerta, profesor de investigación do Instituto, baixo o título «As rías galegas como laboratorio ambiental: o que nos está dicindo o mar». Figueras abordou o papel das rías galegas como espazos clave para observar os cambios ambientais nos ecosistemas mariños.
Ademais, Xosé Antonio Padín Álvarez, investigador do IIM-CSIC, moderou unha mesa dedicada á pesca de baixura e o marisqueo, analizando os retos actuais do sector. Na segunda xornada, Xosé Antón Álvarez Salgado, profesor de investigación, participou na mesa «Adaptación da acuicultura ao cambio climático: novas especies e/ou técnicas de cultivo», cunha intervención sobre a colaboración entre ciencia e sector.
Nesta última mesa presentáronse tamén resultados do proxecto OCCAM, no que participa o IIM-CSIC, sobre a adaptación da acuicultura a novas condicións ambientais, incluíndo casos de estudo galegos como a adaptación do cultivo de troita e estratexias para o cultivo de mexillón.
Carlos Vilas, científico titular do IIM-CSIC, tamén participou na sesión sobre intelixencia artificial e internet das cousas (IoT), presentando a comunicación «Aplicacións da IA en produtos da pesca e da acuicultura: calidade e clasificación de especies».
A presenza do IIM-CSIC completouse con diversas comunicacións en panel de diferentes equipos de investigación, como a presentación do proxecto RIFA, centrado na resposta inmune da ameixa rubia fronte a factores ambientais, coa colaboración do sector marisqueiro de Cangas e Vigo.
A participación do Instituto nesta edición do ForoAcui subliña a diversidade das súas liñas de investigación e a súa conexión cos retos actuais dos recursos mariños e da acuicultura, abarcando desde o impacto ambiental ata a aplicación de novas tecnoloxías.
