O proxecto FunFish, liderado pola investigadora Cristina Velasco Rubial do grupo PhysToFish, céntrase en atopar solucións para un dos retos da acuicultura moderna: mellorar a eficacia alimentaria dos peixes de cultivo sen comprometer o seu benestar.
O traballo consiste no desenvolvemento de xeles alimentarios a partir de ingredientes naturais. Estes suplementos nutricionais e ferramentas de enriquecemento ambiental buscan promover o benestar dos peixes de acuicultura, estimulando comportamentos naturais, reducindo a agresividade e mellorando o estado fisiolóxico de especies como a troita arco da vella.
Segundo a investigadora, FunFish contribuirá a avanzar cara a modelos de produción acuícola máis responsables e sostibles, respondendo ás demandas sociais en materia de benestar animal e produción responsable de alimentos mariños. Ademais, ten potencial de transferencia industrial, xerando valor económico e impulsando a innovación no sector.
Durante o proxecto avalíase o uso de ingredientes funcionais e aditivos nutricionais que melloren a dixestibilidade, a saúde intestinal e os mecanismos de regulación da inxestión, promovendo unha acuicultura máis sostible e eficiente.
FunFish adopta un enfoque integral baseado no concepto ‘One Health’, que integra a saúde animal, humana e ambiental, e contribúe a varios Obxectivos de Desenvolvemento Sostible das Nacións Unidas.
O proxecto conta coa colaboración da empresa Ceamsa e do Centro Interdisciplinar de Investigação Marinha e Ambiental (CIIMAR) de Portugal, reforzando a cooperación entre universidade e industria.
O proxecto está en execución desde setembro de 2025 ata decembro de 2028 e está financiado pola Xunta de Galicia.
