A cidade húngara de Szeged acollerá a competición, onde se darán cita deportistas de máis de 30 países. Mauro Domínguez, alumno da Facultade de Ciencias da Educación e do Deporte, formará parte da selección española. Pola súa banda, Yoel Becerra, estudante da Escola de Enxeñaría Industrial, representará a Uruguai.
Domínguez, membro do grupo de adestramento de kaiak sénior e sub23 da federación española, compaxina a súa preparación no Centro de Alto Rendemento de Madrid con estudos de Educación Primaria. Esta será a súa segunda participación nun mundial universitario, tras a edición de 2024 en Portugal. "A verdade é que o nivel sorprendeume", recoñece sobre a súa experiencia anterior, que considera "unha experiencia máis, que está fóra dos obxectivos da tempada, pero que che permite competir internacionalmente".
Este mundial universitario servirá para Domínguez como peche dunha tempada na que os seus obxectivos principais foron o Campionato do Mundo e o Europeo sub23. Aínda pendente de confirmarse as distancias exactas, o deportista aspira a "estar preto da medalla" e remar en probas de 500 metros, onde obtivo os seus mellores resultados.
Pola súa banda, Yoel Becerra, estudante de Enxeñaría Química Industrial, xa foi medalla de bronce nos Xogos Olímpicos da Xuventude en Bos Aires en 2018. Tras un período afastado da alta competición por dificultades para compaxinar estudos e adestramentos, retomou o nivel tras fichar polo Kayak Tudense. Representou a Uruguai por primeira vez en maio na Copa do Mundo de Brandeburgo.
Becerra participará nas competicións individuais de canoa de 500 e 1000 metros. "Gustaríame ser ambicioso, pero descoñezo o nivel de participación", sinala, e o seu reto sería "pelexar por entrar nas finais". Tras o mundial, competirá nos Xogos Suramericanos en setembro na Arxentina.
