As organizacións Nós Mesmas e Avante organizan en Vigo unha serie de actos ao longo deste mes para conmemorar o Día do Orgullo, que culminarán coa manifestación unitaria o día 27. A pesar da cancelación da festa principal por falta de financiamento, as actividades comezaron o día 5 e inclúen unha pedalada o día 20, que rematará cunha sesión vermú na sede da entidade.
Representantes destas asociacións, Eli Pérez e Gonzalo Lemos, sinalaron en Atlántico TV a gran evolución experimentada polo colectivo LGTBI+ en Vigo dende os seus inicios en 2009. Destacan o aumento da visibilidade e a maior aceptación social, especialmente entre a mocidade. Non obstante, alertan dun preocupante retroceso nos últimos anos, impulsado polos discursos de odio da extrema dereita.
“"Os dereitos acadados non son agasallos que logo nos poidan quitar a gusto de quen estea mandando."
Pérez e Lemos fixeron fincapé na situación das persoas trans, que se atopan especialmente no punto de mira dos ataques LGTBIfóbicos. Subliñan que o sufrimento causado por certos comentarios e a falta de comprensión social pode levar ao illamento destas persoas.
Ambos os representantes lamentan que a lei recentemente aprobada aínda presenta lagoas, como a exclusión das persoas non binarias e a falta de fondos para a súa completa implantación. Critican tamén a actitude dalgúns colectivos, supostamente feministas, que promoven discursos transfóbicos, comparándoos coa extrema dereita. Consideran que a lei é fundamental para a vida de moitas persoas.
En canto á mocidade, recoñecen que a aceptación é maioritaria, pero observan un discurso que bebe da extrema dereita nos institutos, xerando situacións incómodas. A pesar disto, Eli Pérez mantén que a loita pola igualdade debe continuar, xa que o avance cara a ela non está garantido e o contexto actual, con ascensión do fascismo, fai o futuro complexo.
As asociacións ofrecen apoio psicolóxico e especializado, especialmente para persoas con dificultades para atopar especialistas en identidade de xénero e para persoas migrantes solicitantes de selo, ademais de acompañamento e fomento da participación nas actividades.
