O conselleiro de Emprego, Comercio e Emigración, José González, acompañado pola directora xeral de Formación e Cualificación para o Emprego, Zeltia Lado, e a delegada territorial da Xunta en Vigo, Ana Ortiz, visitou hoxe en Vigo o Centro Integrado de Formación Profesional (CIFP) de Coia. Neste centro, ademais da formación regrada, impartiranse accións formativas dirixidas prioritariamente a persoas desempregadas (AFD).
González puxo de relevo o potencial do centro na formación flexible e á carta do mercado laboral en sectores estratéxicos como a automoción e outras áreas relacionadas coa tecnoloxía industrial. Destacou que o CIFP de Coia está á vangarda, con talleres e aulas renovadas, e mantén colaboracións co tecido empresarial, como co Clúster de Automoción e Mobilidade de Galicia (Ceaga), para facilitar a inserción laboral do seu alumnado.
Esta iniciativa concorda co modelo de formación para o emprego promovido pola Xunta, que busca unha formación áxil, flexible e conectada coas necesidades produtivas para responder á cobertura de vacantes. O Goberno galego realiza un importante investimento nas ordes de axudas de formación para o emprego, orientadas á adquisición e mellora de competencias, especialmente para desempregados, aínda que tamén poden participar ocupados.
Actualmente, no CIFP de Coia estanse a impartir seis AFD relacionadas con instalación e mantemento, electricidade e electrónica, e fabricación mecánica, nas que participan case 60 persoas. O centro ten programadas máis de 20 accións formativas para desempregados a desenvolver en dúas anualidades.
O conselleiro lembrou que o prazo de presentación de solicitudes para os apoios autonómicos ás AFD está aberto ata o 30 de novembro. Ata o momento, concedéronse axudas a máis dun milleiro de accións formativas para preto de 17.000 alumnos.
González tamén subliñou a importancia da implicación do Goberno central para potenciar este modelo formativo. Recordou que a Xunta solicitou en varias ocasións máis flexibilidade nos fondos de formación para impulsar proxectos como microformacións con clústeres sectoriais, algo que o marco vixente actual non permite.
