O ciclo, promovido pola facultade e coordinado polo profesor Roberto Silva, conta coa participación das asociacións Anedia, DisCamino e Amizade, así como da Fundación Ingada. A iniciativa busca afondar na integración da actividade física no traballo con persoas con diversidade funcional, física e cognitiva, diabetes ou TDAH.
Esta iniciativa, aberta á cidadanía pero impulsada no marco da formación do alumnado de graos en Educación Infantil e Primaria, permite aos estudantes "coñecer directamente ás persoas e os programas das entidades sociais que atenden a diversidade e incorporan a actividade física ás súas actividades", sinala Silva. Cada coloquio inclúe tamén actividades prácticas e dinámicas de debate aplicadas, co fin de contribuír á aprendizaxe e competencia nos ámbitos educativo e deportivo, presentando ademais "experiencias de vida, moi exemplificantes" para os futuros docentes.
O ciclo, que se desenvolve na Escola de Enxeñaría Forestal, comezou cunha sesión sobre a asociación Anedia (nenas, nenos e xente e adulta con diabetes de Galicia), que presentou propostas sociais e deportivas, e ferramentas para responder a situacións de hipo ou hiperglucemia. A seguinte sesión estivo protagonizada por DisCamino, que amosou as posibilidades das bicicletas adaptadas para persoas con diversidade funcional no Camiño de Santiago.
Posteriormente, a Fundación Ingada abordou a importancia da actividade física para nenos e nenas con trastorno por déficit de atención e hiperactividade (TDAH), que afecta entre o 5% e o 10% da poboación infantil. A actividade incluíu casos prácticos sobre atención, hiperactividade e impulsividade, destacando os beneficios da práctica física a nivel conductual e cognitivo.
Finalmente, o ciclo complétase este xoves 29 de outubro cun coloquio con representantes da asociación Amizade, de persoas con discapacidade da comarca de Pontevedra.
