A resolución definitiva desta convocatoria, publicada hoxe no Boletín Oficial da Provincia, reparte os fondos en réxime de concorrencia competitiva e apoiará o traballo de colectivos que atenden a persoas con discapacidade, problemas de saúde mental, enfermidades crónicas, así como a persoas en situación de vulnerabilidade, infancia, mocidade, familias numerosas e persoas LGTBI.
A alcaldesa, Inés Rey, destacou que "é unha obriga fundamental das institucións públicas manter e aumentar unha rede dinámica de apoio ao tecido social, poñendo os recursos de todos e todas ao servizo de iniciativas e programas que traballan directamente sobre o territorio e a cercanía e que sirven, en definitiva, para mellorar a vida da xente".
As subvencións, que oscilan entre 1.122 e 3.395 euros por entidade, financiarán actuacións como servizos profesionais de traballo social, actividades formativas e propostas de creación audiovisual.
Nas próximas semanas resolveranse tamén as convocatorias de subvencións de Igualdade e Participación, que completarán as axudas da área ao tecido asociativo coruñés.
A resolución foi asinada o 19 de outubro pola concelleira de Benestar Social, Participación e Igualdade, Nereida Canosa, por delegación da Xunta de Goberno Local. A convocatoria contaba cun crédito inicial de 125.000 euros.
