O Centro Tecnolóxico do Mar (CETMAR) achegou a pesca e a conservación mariña a máis dun centenar de escolares de 5º e 6º de Primaria dos Colexios Alba e Lar de Vigo. As actividades tiveron lugar nas últimas semanas no Centro de Formación A Aixola, xestionado polo CETMAR para a Consellería do Mar.
Os alumnos desprazáronse en dúas xornadas ao centro, situado en instalacións da Autoridade Portuaria de Marín e financiado polo Fondo Europeo Marítimo de Pesca e Acuicultura (FEMPA). Alí coñeceron a labor formativa do centro nos oficios marítimo-pesqueiros, como artes de pesca, reparacións mecánicas e construción naval.
A visita incluíu un obradoiro sobre pesca responsable, onde a través dun xogo participativo se fomentou a reflexión sobre a xestión pesqueira baseada no coñecemento científico. Os colexios participantes xa desenvolveran proxectos de escola azul o curso pasado e este ano traballan coas Research Boxes do proxecto CIBBRiNA, financiado polo programa LIFE da Unión Europea.
O proxecto CIBBRiNA busca reducir as capturas accidentais de especies mariñas ameazadas durante a actividade pesqueira. As caixas de investigación pretenden concienciar sobre esta problemática e propoñen actividades prácticas para que o alumnado investigue as artes de pesca, as especies afectadas e as posibles solucións.
Esta iniciativa fomenta o pensamento crítico e a relación entre a actividade pesqueira e a conservación mariña, destacando a colaboración entre o sector e a comunidade científica. A visita ao centro A Aixola permitiu un achegamento máis directo ao mundo da pesca.
A Rede Galega de Escolas Azuis integra centros educativos que promoven a cultura oceánica e acuícola, conectando a comunidade educativa co seu contorno mariño. A rede ofrece apoio para proxectos, materiais e información sobre financiamento, co obxectivo de fomentar unha aprendizaxe crítica sobre os ecosistemas acuáticos e a importancia do océano.
