Tras completarse o segundo mandato do profesor Xosé Manuel Buxán á fronte do centro, a profesora do Departamento de Debuxo Carmen Hermo é a única candidata ao Decanato da Facultade de Belas Artes. Actual secretaria académica da facultade, Hermo Lage lidera unha candidatura que se someterá á votación da Xunta de Facultade o luns 27 de xullo.
Carmen Hermo , licenciada en Belas Artes pola Universidad de Salamanca e doutora pola Universidade de Vigo, salientou o “nivel de traballo e compromiso” dos integrantes da candidatura. A súa motivación para dar o paso foi contar con “xente nova á que lle apeteza involucrarse” no goberno da facultade. O equipo propón a Carmen Lage como vicedecana académica, Basilisa Fiestras como vicedecana de alumnado, José Andrés Santiago como vicedecano de internacional e Marcos Covelo como secretario académico.
Tras a proclamación provisional, ábrese un período de reclamacións previo á aprobación definitiva o venres 24. A votación terá lugar o luns seguinte entre os 37 integrantes da Xunta de Facultade.
“"A convivencia implica moitas cousas. A facultade debe ser un lugar apracible e interesante, onde xurdan sinerxías que nos fan traballar a todos e onde se garanta o necesario para poder traballar e crear."
Carmen Hermo destacou a convivencia como pilar central da súa proposta, subliñando a necesidade dun “fogar novo” para a profesión, xa que o actual edificio, un antigo cuartel rehabilitado en 1994, “xa ten os seus achaques”. Sinalou a posibilidade de cesión á Universidade da parcela de Tafisa e a busca dun proxecto axeitado para Belas Artes e Deseño, sen descoidar as reparacións urxentes nas instalacións actuais.
A candidata tamén avogou por reforzar a presenza da facultade na cidade e no contexto cultural galego, lembrando que alí se forma “o futuro da cultura” de Galicia.
O actual decano en funcións, Xosé Manuel Buxán, valorou positivamente o posicionamento da facultade no contexto social, cultural e profesional durante os seus máis de seis anos á fronte. Destacou o equipo humano e a posta en marcha do Máster en Creación Artística Contemporánea. Como aspectos negativos, sinalou as complicacións do edificio e a falta de consenso nun novo plan de estudos para o Grao de Belas Artes.
