A obra, editada polo Servizo de Publicacións da UVigo, foi presentada este venres no salón de graos da Facultade de Bioloxía. O autor estivo acompañado polo catedrático de Zooloxía e exreitor da UVigo Salustiano Mato, e o director do Servizo de Publicacións, David Tizón.
O director do Servizo de Publicacións cualificou a publicación como "un fito excepcional no mundo da Bioloxía, unha obra única no seu xénero que resolve un problema histórico: a falta de nomes propios para os invertebrados nas nosas linguas". Destacou a súa dobre versión, dixital e en papel, como "unha verdadeira peza de coleccionista" a un prezo accesible.
Pola súa banda, Salustiano Mato eloxiou a figura de Carlos Garrido, destacando a combinación de coñecementos de zooloxía, terminoloxía e tradución especializada necesarios para unha obra desta magnitude. Lembrou a importancia da ferramenta para os docentes que imparten clases en galego, permitindo "ser coidadosos e rigorosos" no uso dos termos.
O propio autor explicou que o volume de 1356 páxinas ofrece un amplo repertorio de denominacións científicas, paracientíficas e vernáculas de protozoos e animais invertebrados. Identificado coas siglas DZZI, conta con preto de 180.000 termos e 28.000 verbetes zoonímicos, sendo un dos maiores dicionarios de zooloxía existentes.
Trátase da terceira versión dun traballo iniciado en 1997. A edición actual amplía considerablemente o traballo anterior, incorporando un repertorio de nomes vernáculos para cubrir lagoas na nomenclatura dos invertebrados e elaborando novos nomes en galego-portugués e español a partir de denominacións inglesas e alemás mediante "cuidadoso decalque semántico".
A obra emprega a etiqueta 'português' para identificar a lingua galego-portuguesa, recollendo variantes galegas, portuguesas e brasileiras. Esta perspectiva é relevante para a terminoloxía zoolóxica, onde a diversidade de denominacións pode dificultar a identificación e a tradución.
