Para facilitar a chegada das persoas que queiran contemplar a eclipse desde o Monte Faro de Budiño, o Concello do Porriño habilitará un servizo de transporte en autobús gratuíto desde o casco urbano. Debido á orografía do terreo, o transporte deixará ás persoas usuarias a uns dous quilómetros do cumio, debendo facerse o último tramo a pé.
Os autobuses sairán desde a Avenida de Galicia e a N-550 ás 17:00, 17:40 e 18:25 h. O regreso será desde o Faro, logo da eclipse, ás 22:15, 23:00 e 23:45 h. Cada viaxe ten 37 prazas e encheranse por orde de chegada.
Ademais, habilitaranse dúas zonas de aparcamento para vehículos preto do Faro para quen desexe subir a este enclave único e participar nas actividades programadas.
O Concello tamén repartirá 1.000 gafas homologadas no Faro de Budiño para a observación segura da eclipse. Ademais, entregarase unha primeira remesa de 750 lentes aos nenos e nenas menores de 18 anos empadroados no Porriño, que se distribuirán o mércores pola mañá.
A programación especial “Sombra e luz. Vive a eclipse no Faro de Budiño” inclúe tamén un posto de comida e bebida xestionado pola Comisión de Festas de San Blas.
A iniciativa busca combinar divulgación científica, posta en valor do patrimonio natural e actividades familiares nun dos espazos máis emblemáticos do municipio. O alcalde, Alejandro Lorenzo, e a concelleira de Turismo, Vanessa Ucha, destacaron a oportunidade de coñecer o patrimonio natural a través dunha experiencia diferente.
A programación comezará ás 17:15 h cun roteiro circular guiado polo Monte Faro (prazas limitadas). Ás 18:15 h haberá un obradoiro infantil con pintacaras e elaboración de chapas conmemorativas (con inscrición previa).
A entrega de lentes e material divulgativo realizarase entre as 19:00 e as 19:45 h. As persoas interesadas nos roteiros ou obradoiros deben inscribirse previamente no Rexistro Xeral do Concello do Porriño, de forma presencial ou telemática.
Recoméndase acudir con roupa cómoda e calzado deportivo, e subliñase que a observación da eclipse debe facerse exclusivamente con lentes homologadas.
O Concello agradece a colaboración da Deputación de Pontevedra e da Comunidade de Montes Veciñais en Man Común San Salvador de Budiño.
