O Concello de Redondela informou dun adiamento no comezo do servizo de socorrismo nas praias da Punta e Arealonga. A causa é a suspensión do proceso de licitación do contrato, motivada pola interposición dun recurso administrativo.
Segundo as explicacións do Goberno local, este recurso obriga a paralizar o procedemento ata que o Tribunal Administrativo de Contratación Pública de Galicia (TACGal) emita unha resolución definitiva. A alcaldesa, Digna Rivas, sinalou que o Concello está suxeito aos prazos legais deste órgano independente, pero reafirmou que a prioridade do executivo municipal é garantir a seguridade nos areais durante a tempada estival.
“"En canto chegue a resolución do tribunal, o Concello axilizará ao máximo todo o proceso administrativo para que o servizo de socorrismo poida comezar o máis rápido posible."
Mentres tanto, o servizo municipal de limpeza de praias xa opera con normalidade e continuará ata o 15 de setembro. Este operativo desenvólvese con criterios de protección ambiental e mantemento sostible do litoral. As praias da Punta, Arealonga e Os Penedos terán limpeza diaria, estendéndose tamén aos paseos marítimos, accesos, zonas verdes, aparcadoiros e áreas de xogos infantís.
Ademais, reforzaranse as tarefas noutras praias: Soutoxuste e Rande terán limpeza tres veces por semana, e Cabanas (en Trasmañó), dúas veces. O Concello destaca que estes traballos respectan o equilibrio biolóxico, realizando a retirada de algas e restos vexetais de forma manual e conforme á normativa, xa que son parte natural do ecosistema mariño e protexen as praias da erosión. O servizo realízase en colaboración cun centro especial de emprego de iniciativa social.
