O catedrático de Filosofía do Dereito da Universidad de Cantabria, José Ignacio Solar Cayón, impartiu este xoves na Facultade de Dereito do campus de Ourense a conferencia "Intelixencia artificial e administración de xustiza". A sesión, organizada pola Área de Filosofía do Dereito e o Departamento de Dereito Privado da Universidade de Vigo, abordou os retos e oportunidades da IA neste ámbito xurisdicional.
Na súa intervención, Solar Cayón explicou como a IA pode ser aplicada na administración de xustiza e como o regulamento europeo trata a utilización destes sistemas. Sinalou que a lexislación estatal española xa permite utilizar a IA para asistir aos xuíces na toma de decisións e na xeración de borradores de sentenzas, aínda que o Ministerio aínda non desenvolveu un modelo para esta tarefa.
“"Existe o problema de que poidan confiar excesivamente nos resultados do sistema, sobre todo nun contexto no que os xuíces están sobrecargados de traballo"
O experto tamén alertou sobre os riscos da implementación, como o "nesgo de automatización", que leva a unha confianza excesiva nos resultados do sistema e a unha posible delegación de funcións por parte dos xuíces, especialmente ante a sobrecarga de traballo.
José Ignacio Solar Cayón é unha figura referente na investigación da intelixencia artificial xurídica, cunha traxectoria de case tres décadas. Foi investigador principal de proxectos financiados polo Plan Estatal de I+D+i e é autor de varias monografías sobre a materia.




