Un estudo realizado por investigadores das universidades de Vigo, Miguel Hernández de Elche (UMH) e Internacional de Valencia, e publicado na revista científica International Gambling Studies, sinala que os adolescentes federados en fútbol mostran unha maior frecuencia de apostas, unha maior intención de xogar e máis indicadores de xogo problemático en comparación con aqueles que practican este deporte sen estar federados ou que realizan outras disciplinas deportivas. O traballo contou coa participación de 728 estudantes de Educación Secundaria Obrigatoria de Galicia, con idades comprendidas entre os 12 e os 17 anos.
Os resultados indican que os futbolistas adolescentes amosaron unha maior motivación relacionada coa procura de emocións e, en comparación con outros deportistas federados, puntuacións máis elevadas nas motivacións económicas e sociais. Tamén se observou unha menor percepción do risco asociado ás apostas. Os autores subliñan que, aínda que o estudo identifica asociacións, non permite establecer unha relación causal directa entre a práctica do fútbol e as condutas de apostas, pero contribúe a identificar contornas prioritarias para desenvolver estratexias preventivas.
A investigación tamén destaca a crecente presenza das apostas no universo futbolístico, onde retransmisións, redes sociais e contidos promocionais contribúen a presentalas como unha prolongación natural da afección. A contorna dos equipos e o sentimento de pertenza ao grupo tamén favorecen a adopción de comportamentos considerados normais. Os investigadores propoñen ampliar os programas de prevención do xogo problemático a clubs deportivos, federacións e escolas de fútbol, dirixidos a adolescentes, adestradores e familias.
“"O problema non é o fútbol como actividade deportiva, senón a progresiva normalización das apostas dentro da cultura futbolística. Cando apostar se presenta como unha forma de demostrar coñecementos deportivos, emocións ou participar no espectáculo, desdibúxanse as fronteiras entre gozar do deporte e xogar diñeiro."
Aínda que en España está prohibido que os menores de 18 anos aposten, o Observatorio Español das Drogas e as Adiccións indica que o 24,4% dos estudantes de 14 a 18 anos participou en xogos de apostas con diñeiro o último ano, e preto do 5% presenta indicadores de xogo problemático. Os investigadores lembran que a adolescencia é unha etapa sensible á influencia de iguais e á procura de emocións.
