Nun documento con data do pasado mércores 27 de maio, o Ministerio competente sinala que continúa pendente da transferencia da parcela, solicitada formalmente en xullo de 2025, e subliña que se trata do “elemento necesario para poder avanzar nas seguintes fases do proxecto”, incluída a licitación da redacción do mesmo.

Dende o Executivo central déixase claro que sen esa cesión de titularidade non é posible activar os seguintes pasos administrativos. Na práctica, isto implica que a licitación do proxecto técnico da biblioteca non poderá iniciarse ata que o Concello formalice a entrega do solo.

O PP de Vigo utilizou este posicionamento para cargar contra o alcalde, Abel Caballero. A súa voceira local, Luisa Sánchez, sostén que o escrito do Ministerio “desmente” a versión do goberno municipal, que defendía que a parcela xa estaba a disposición do Estado.

Segundo a dirixente popular, a Xerencia de Urbanismo remitiu un oficio ao Ministerio o pasado 13 de abril no que se comunicaba que se estaban realizando os trámites necesarios para a cesión da parcela. O PP asegura que ese movemento chegou despois das súas críticas públicas e denuncia o que considera un atraso inxustificado na xestión da infraestrutura.

Sánchez insistiu en que o acordado entre administracións non era a mera “posta a disposición” do solo, senón a súa cesión formal, o que implica o cambio de titularidade da parcela.

A voceira popular responsabilizou directamente ao alcalde, Abel Caballero, do atraso do proxecto, afirmando que o goberno local tardou anos en concretar unha ubicación definitiva para a biblioteca. Neste contexto, o PP reclama ao Concello que axilice de inmediato a cesión da parcela da rúa Lalín para desbloquear a actuación.

A Biblioteca do Estado en Vigo segue pendente de avanzar na súa fase administrativa básica, á espera de que se complete o trámite urbanístico e patrimonial entre o Concello e o Ministerio, condición indispensable para activar a redacción do proxecto.