O Conservatorio de Música de Verín deu a benvida ao curso 2026/2027 cun acto de presentación dirixido ao alumnado e ás familias, rexistrando un aumento de matriculacións respecto ao ano anterior. Este crecemento consolida a evolución positiva do centro nos últimos anos, culminando un período significativo marcado pola graduación da súa primeira promoción de Grao Profesional.
Grazas a esta ampliación, o alumnado pode completar no propio Conservatorio de Verín tanto o Grao Elemental como o Grao Profesional, sumando ata dez anos de formación musical regrada na vila. Isto elimina a necesidade de desprazarse a outros municipios para continuar os estudos musicais.
Diego Lourenzo, responsable da área do Conservatorio, destacou que "o incremento do alumnado confirma a evolución do Conservatorio e pon en valor o traballo realizado para ofrecer en Verín unha formación musical de calidade e de proximidade". Engadiu que "o obxectivo é seguir dotando o centro dos recursos necesarios para continuar medrando e mellorando a súa oferta educativa".
O crecemento da actividade lectiva tamén supón novas necesidades docentes e organizativas. Por iso, durante este curso reforzarase o profesorado para atender o aumento das horas lectivas. Ademais, o Concello de Verín continuará traballando na mellora e acondicionamento dos espazos, na adquisición de instrumentos e no desenvolvemento de actividades complementarias á formación regrada.
Lourenzo sinalou que "seguiremos poñendo os esforzos necesarios para dotar ao Conservatorio da mellor opción posible, tanto en horas de profesorado como no acondicionamento de espazos, compra de instrumentos e actividades que acompañen a formación regrada".
Desde o Concello tamén se subliña o papel fundamental da ANPA do Conservatorio, cuxa implicación e colaboración foron cruciais para os avances acadados e a dinamización da comunidade educativa. Anímase ao conxunto de nais e pais a participar activamente na asociación, achegando propostas e colaborando nas iniciativas que contribúan ao crecemento do centro.
O curso 2026/2027 comeza, polo tanto, cun aumento do alumnado e novos retos para un centro que busca facilitar unha formación musical completa e de proximidade para os mozos e mozas de Verín e da súa contorna.
