O debate parlamentario sobre o incendio de Oímbra saldouse cunha moción do BNG rexeitada polos populares. O deputado nacionalista Secundino Fernández criticou á conselleira do Medio Rural, María José Gómez, por "botar balóns fóra" en lugar de "aclarar esta grave neglixencia" e "agochar as vergoñas do PP". Fernández subliñou a necesidade de "depurar responsabilidades" e de tomar "en serio" os riscos de incendios, criticando a "lentitude e a neglixencia" que, ao seu xuízo, deberían ter "consecuencias políticas".
Fernández tamén sinalou a "hipocresía" do PPdeG, acusando o partido de "utilizar politicamente a traxedia" e de "construír unha estratexia política" en lugar de "agardar pola resolución xudicial". O deputado popular Miguel Ángel Viso cualificou o texto da moción de "pura hipocresía" e acusou o BNG de "facer das cinzas material de campaña" e de "atacar ao PP" por "molestarlles que os galegos nos dean a súa confianza".
“"Vergoña política é soster a alcaldesa de Oímbra e manter cun cargo a responsable de Seaga e non esixir responsabilidades. Vostedes son os que manteñen os pirómanos na Consellería."
A deputada do PSdeG, Carmen Rodríguez Dacosta, defendeu o dereito dos afectados a "saber que pasou" e que "medidas vai tomar a Xunta para que non volva ocorrer", lamentando que actuacións preventivas "tivesen a orixe" dun dos maiores lumes da historia de Galicia. Criticou que a Xunta "segue negándose a facer unha análise rigorosa" e que a "responsabilidade política non pode quedar enterrada baixo a escusa dunha investigación xudicial".
Pola súa banda, o deputado de Democracia Ourensana, Armando Ojea, afirmou que en Ourense están "moi pendentes" dos incendios deste verán e que "se non se aprendeu nada desde o ano pasado", as "responsabilidades políticas teranse que dirimir nas urnas das eleccións autonómicas".
