A Ruta do Viño de Valdeorras, entidade organizadora, manifestou a súa gran satisfacción polo éxito desta edición, que afianza a cita como un dos eventos enoturísticos de referencia en Galicia. A pasada fin de semana, do 15 ao 17 de maio, a asociación organizou a súa xornada 'Primavera de Portas Abertas', unha iniciativa de promoción enogastroturística do territorio impulsada por Turismo de Galicia.

Dende a organización salientan un alto grao de satisfacción entre as adegas, establecementos e entidades colaboradoras pola resposta do público. Contabilizáronse máis de 700 participantes nas distintas propostas que combinaron viño, natureza, cultura e gastronomía. As visitas a adegas, con percorridos guiados e degustacións, foron o eixo central da programación, moitas delas completando a súa capacidade e rexistrando unha importante afluencia de visitantes interesados no potencial vitivinícola de Valdeorras.

Un dos momentos máis destacados foi o inaugural Túnel do Viño, celebrado o venres 15 de maio, que permitiu degustar máis dunha vintena de referencias de distintas adegas nun ambiente festivo con música en directo. Os buses do viño, as actividades programadas e as visitas ao patrimonio natural e cultural da comarca, incluíndo enclaves como Pena Trevinca, o Camiño de Inverno, o Santuario de As Ermidas ou o Parque Natural Serra da Enciña da Lastra, tamén foron moi valorados.

A organización tamén subliña o aumento de pernoctacións nos establecementos turísticos da comarca e as degustacións nos menús especiais dos restaurantes adheridos, confirmando o impacto positivo do evento no sector turístico e hostaleiro de Valdeorras.