O xerente do Servizo Galego de Saúde, Luis León, realizou este mércores unha visita ao Hospital Público do Barco de Valdeorras e ao Hospital Público de Verín. Esta rolda de contactos enmárcase na análise da situación dos centros sanitarios galegos e na planificación das súas necesidades asistenciais a curto e medio prazo.
Durante o seu percorrido, León coñeceu os distintos servizos de ambos os centros co obxectivo de valorar as súas realidades organizativas, estruturais e tecnolóxicas.
O xerente lembrou a aposta do Sergas pola mellora da dotación dos hospitais comarcais, incluíndo o subministro de novo equipamento como ecógrafos e mamógrafos. Destacou tamén a recente licitación dunha nova incubadora de transporte extrahospitalario para o Hospital Público de Valdeorras.
Esta visita suma ás xa realizadas polo responsable sanitario a outros hospitais comarcais como os de Monforte de Lemos, O Salnés e Virxe da Xunqueira de Cee. Estes encontros subliñan o compromiso da Xunta coa potenciación destes centros para incrementar a súa capacidade asistencial e optimizar a xestión de recursos.
