A provincia de Ourense acolleu este luns unha dobre cita co folclore internacional. A Pobra de Trives e Viana do Bolo foron os escenarios das últimas actuacións das 41 Xornadas de Folclore. Nel, seis agrupacións de diferentes países compartiron a súa cultura a través de música, danzas e vestiarios representativos.
En Viana do Bolo, a Praza Maior foi o punto de encontro para as delegacións de Ecuador, Serbia e Taiwán. O grupo ecuatoriano Ñukanchik, o conxunto serbio "Tucovic" e o Teatro de Danza Folclórica YiTzy de Taiwán ofreceron ao público unha mostra das súas tradicións.
A formación serbia "Tucovic", fundada en Belgrado en 1978, é recoñecida pola súa experiencia internacional. Para Dejan Simyonov, un dos seus membros, as Xornadas ourensás son xa a súa "segunda casa". Destacan pola súa posta en escena, o colorido do vestiario e a música tradicional.
Pola súa banda, en Trives, o Patio de Santa Leonor acolleu as actuacións de Armenia, México e Senegal. O Sebastia Dance Ensemble-Taron Aesthetic Center representou as tradicións armenias, a Compañía Nacional de Danza Folclórica de Nieves Paniagua achegou o repertorio mexicano, e o Ballet Jammu mostrou a música e danzas senegalesas.
As Xornadas continuarán hoxe na capital ourensá cun desfile que partirá ás 22:30 do Parque de San Lázaro e percorrerá o centro ata a Praza Maior, onde haberá actuacións conxuntas ás 23:00. O certame concluirá mañá en Ribadavia.
