A iniciativa, promovida polo Concello, consolídase como unha ferramenta clave para axudar ás familias a compatibilizar a vida laboral e familiar, ao tempo que ofrece espazos de aprendizaxe e convivencia para a infancia. A principal novidade desta edición é a integración da eclipse solar do 12 de agosto de 2026 como fío condutor pedagóxico de todas as actividades.
Ao longo das diferentes quendas, os participantes poderán achegarse á astronomía e á observación do ceo mediante xogos, experimentos e obradoiros para a observación segura do fenómeno. A primeira quenda, denominada VimiAsalto, desenvolverase ata o 3 de xullo con 80 nenos e nenas que explorarán a historia e o patrimonio local a través de dinámicas inspiradas no emblemático Asalto ao Castelo.
A segunda quenda, entre o 6 e o 24 de xullo, acollerá 130 participantes no pavillón municipal, combinando actividades lúdico-deportivas con propostas de educación ambiental, reciclaxe e iniciación á astronomía, incluíndo contidos específicos sobre a eclipse. Ademais, haberá 18 prazas de VimiInformática na aula CEMIT.
As seguintes quendas, do 27 de xullo ao 14 de agosto e do 17 ao 28 de agosto, contarán con 110 participantes cada unha. Nestes períodos haberá novas edicións de VimiChef, para iniciarse na cociña de forma práctica e divertida, xunto a propostas de VimiDeporte e VimiInformática.
A proposta VimiAventura nas parroquias terá lugar este ano no pavillón de Baíñas, ao ser a única parroquia que alcanzou o número mínimo de inscricións. Esta actividade achegará tamén aos nenos e nenas do rural contidos sobre a eclipse e descubrimento científico.
Como complemento, o Concello ofrece o servizo de madrugadores de 08.00 a 10.00 horas, buscando facilitar maior flexibilidade horaria ás familias. Desde o goberno local, presidido por Mónica Rodríguez, agradecen a confianza e destacan o esforzo por ofrecer unha programación de calidade que combina aprendizaxe, diversión, patrimonio e ciencia.
“"A través da eclipse solar como fío condutor común, Vimiverán 2026 busca converter un acontecemento único nunha oportunidade para espertar a curiosidade, fomentar o coñecemento e ofrecer experiencias educativas significativas á infancia do municipio."
O programa conta co financiamento da Consellería de Política Social e Igualdade, a través do Plan Corresponsables, co obxectivo de promover recursos que favorezan a conciliación e a corresponsabilidade familiar.
