Os traballos, que se enmarcan nas actuacións de conservación e posta en valor do patrimonio local para o ano 2026, continúan o plan de escavación na zona visible do castro. A campaña actual divídese en dous sectores, norte e sur, co obxectivo de ampliar progresivamente o coñecemento do xacemento e descubrir case a metade da súa extensión total.
No sector norte, os arqueólogos están a escavar unha gran cabana de planta ovalada, da que xa se exhumou parte do seu muro. Esta estrutura, de notable anchura e carácter monumental, podería ofrecer novos datos sobre a organización interna do poboado.
Ademais, retómase o estudo da muralla do Castro das Barreiras, un elemento distintivo do xacemento. A súa construción en bancais ou terrazas evidencia unha técnica complexa e altamente planificada. Asociado a este sistema defensivo, estase a escavar un vertedoiro cerámico con numerosos restos de alfarería, que proporciona información sobre a vida cotiá e a xestión de residuos no asentamento.
“"A muralla evidencia unha técnica construtiva complexa e altamente planificada."
Entre os achados máis significativos desta campaña, o equipo arqueolóxico destaca a recuperación dun betilo, un elemento de carácter simbólico ou relixioso, que foi recibido con especial satisfacción pola súa relevancia para o coñecemento do xacemento.
Os traballos complétanse cun programa de visitas guiadas para o alumnado dos centros educativos do municipio, buscando achegar o patrimonio arqueolóxico á comunidade local e fomentar o seu valor entre a mocidade.
“"Seguimos apostando dende o corazón da Costa da Morte por converter o castro das Barreiras nun referente do turismo arqueolóxico, pasiño a pasiño."
