A competición, coñecida como Copa Mestre Montero, é puntuable para a Supercopa de Galicia e está plenamente asentada no calendario desta modalidade, celebrando máis de dez edicións. Trátase dunha proba sen morte, homologada pola Federación Galega de Caza e apoiada pola Real Sociedade Canina de España, que cada ano congrega a centos de persoas na localidade.

Este ano, espérase a participación de arredor de cen concursantes procedentes de todo o territorio nacional, con especial presenza de Galicia, Asturias, Cantabria, País Vasco e Castela e León. A chegada destes participantes, moitos deles acompañados por familiares e amigos desde o xoves ou venres, xera un notable impacto económico en Melide.

A proba desenvolverase en catro campos debidamente sinalizados no coto do Pilar, un punto elevado na provincia da Coruña onde conflúen os municipios de Melide, Santiso e Toques. Os vencedores recibirán premios valorados en 8.000 euros, que inclúen contías en metálico, material técnico, penso e produtos locais.

Ademais, a actividade cinexética terá continuidade na zona, xa que o vindeiro sábado, 25 de abril, celebrarase unha proba de carácter comarcal dirixida especificamente a cazadores locais.