Esta celebración, que prioriza a posta en valor da cultura e a tradición galegas, contará cunha programación variada que inclúe cantos de taberna, o tradicional Serán e diversas actividades deseñadas para fomentar a participación da veciñanza e dos visitantes.
“"É unha fin de semana na que a música e o baile enchen cada rincón de Melide. O máis importante é a participación e a implicación da xente, da veciñanza e dos que veñen da contorna de Melide."
A orixe da Foliada remóntase a un proxecto dun grupo de amigos que buscaba traer o Serán á localidade. Co paso do tempo, a iniciativa medrou ata converterse nunha gran celebración. Un punto de inflexión foi no ano 2009, cando a festa se trasladou do pazo de congresos ao centro da vila, o que supuxo un salto exponencial na súa proxección. A inclusión dos cantos de taberna tamén marcou unha diferenza significativa no cartel, pero o maior cambio obsérvase na crecente implicación da xente, coa participación de todo o pobo.
Aínda que a festa evolucionou, mantén a súa estrutura orixinal, priorizando sempre actividades para todas as idades que representen a cultura e tradición galegas. O programa deste ano destaca polo equilibrio, sendo os cantos de taberna un dos eventos fundamentais, con 21 grupos participantes na súa décimo quinta edición. O Serán, considerado o xerme da foliada, contará coa presenza de 14 grupos da contorna de Melide e de Santurce, no País Vasco. Ademais, esta edición reivindicará as letras coa presentación musicalizada de O violín que trae o vento, un libro de Adrián Méndez, e incluirá un obradoiro de baile impartido por un veciño, así como a representación de xogos tradicionais.
A importancia da Foliada para Melide reside en que se converteu na festa do pobo, un espazo onde se reivindica a cultura local e se homenaxea o canto, o baile e a tradición. A organización busca mellorar cada ano, arranxando erros e repetindo o que máis gusta, co obxectivo de que cada vez máis xente participe nesta celebración.
