O Concello de Melide pechou o exercicio de 2025 cun saldo positivo de 898.411 euros, o que supón un incremento de 951.705 € respecto ao ano anterior. Esta mellora económica tamén se reflicte na regra de gasto, que aumentou de 738.234 € en 2024 a 1.008.985 € neste último exercicio.
Ademais, a débeda viva do Concello de Melide experimentou unha redución considerable, pasando dun 6,42% a un 3,60%. A entidade municipal non mantén débedas con entidades bancarias, unicamente os préstamos solicitados polo anterior goberno do Partido Popular á Deputación da Coruña nos anos 2015 e 2016, dos cales restan por amortizar 304.504 euros.
O aforro neto do goberno local sitúase en 1.284.179 €, representando o diñeiro dispoñible tras cubrir todos os gastos correntes. O remanente de tesourería ao peche do exercicio ascende a 4.483.318 €.
En canto aos investimentos reais, superaron o millón de euros, cunha cifra de case 1 millón de euros, o que representa un aumento de 200.000 € respecto ao ano anterior. Deste xeito, os investimentos acumulados entre 2019 e 2025 suman 7,9 millóns de euros, en contraste cos 1,8 millóns do anterior goberno do PP no período 2016-2019. O período medio de pago rexistrado no cuarto trimestre do ano foi de 2,43 días.
