O Concello de Melide vén de publicar hoxe no Boletín Oficial da Provincia da Coruña as bases reguladoras para a convocatoria de axudas á natalidade, que se poderán solicitar a partir de mañá, 1 de setembro, ata o vindeiro 16 de novembro.
Esta iniciativa municipal está dirixida a pais e nais que estean empadroados no municipio e que tivesen fillos ou fillas, ben por nacemento ou por adopción, entre o 1 de novembro de 2025 e o 31 de outubro de 2026. Para poder acceder a estas axudas, un dos proxenitores, como mínimo, deberá acreditar un empadroamento de seis meses de antelación á data do parto ou adopción, e o menor deberá figurar tamén inscrito no padrón municipal.
A convocatoria conta cun orzamento total de 15.000 euros, e prevé achegas económicas de ata 300 euros por cada novo membro da familia nacido ou adoptado dentro do período establecido. Na edición anterior, o Concello xa concedeu 37 destas axudas, cubrindo todas as solicitudes que cumprían cos requisitos.
O obxectivo principal desta medida é complementar o apoio ás unidades familiares do municipio, contribuíndo así a fixar poboación e a combater o despoboamento.
As bases tamén esixen que a persoa solicitante se comprometa a manter o seu empadroamento e o do seu fillo ou filla no Concello durante catro anos, garantindo a residencia efectiva nas parroquias do municipio.
Para formalizar a solicitude, é necesario cubrir o modelo normalizado (Anexo I) e presentalo xunto coa documentación requirida no Rexistro Xeral do Concello. Entre os documentos necesarios atópanse a fotocopia compulsada do libro de familia e DNI, a copia do auto xudicial en caso de adopción, declaracións xuradas sobre outras axudas, compromisos de empadroamento e devolución, certificados bancarios e de estar ao corrente coas obrigas tributarias e coa Seguridade Social.
Estas achegas son compatibles con outras subvencións de similar finalidade que se poidan recibir doutros organismos públicos.
As bases completas e o formulario de solicitude están dispoñibles para a súa consulta e descarga no Boletín Oficial da Provincia da Coruña.
