A conselleira de Política Social e Igualdade, Fabiola García, mantivo esta mañá unha xuntanza co presidente da mancomunidade Terra de Celanova, Jaime Sousa, para trasladarlle o compromiso da Xunta de Galicia coa atención ás persoas maiores nos concellos rurais. Na reunión, exploraron novas vías de colaboración entre ambas institucións co obxectivo de mellorar as políticas sociais e ampliar os servizos ofrecidos á veciñanza.
Como exemplo desta aposta, Fabiola García destacou a rede de casas do maior, unha iniciativa pública impulsada polo Goberno galego para achegar servizos de atención diúrna ao ámbito rural. Neste sentido, lembrou que a Xunta prevé impulsar este ano a creación de dez novos recursos desta natureza, o que suporá un incremento ata alcanzar as 800 prazas dispoñibles.
A conselleira tamén explicou que o modelo galego de coidados busca garantir que as persoas maiores poidan elixir onde e como desexan vivir. Para iso, subliñou a importancia de dotar o rural de servizos que faciliten a súa atención sen que teñan que renunciar a residir na súa contorna. Neste contexto, informou ao presidente da mancomunidade que a Xunta continuará reforzando os recursos nestas áreas e responderá ás necesidades da poboación mediante iniciativas pioneiras como o Bono Coidado no Fogar, que xa beneficia a 40.000 galegos.
