O recoñecemento pon en valor a traxectoria da agrupación, que logrou converter a figura e a poesía de Curros Enríquez nun espectáculo global. O proxecto, que naceu en 2021, destaca pola súa complexidade loxística e a capacidade de mobilizar a toda a vila, integrando a músicos, corais, bailaríns e gaiteiros nunha posta en escena conxunta.
A dirección da formación musical subliña que este premio é o resultado dun traballo colectivo sostido no tempo. Máis aló da excelencia artística, a banda aposta por unha escola de formación potente que garante o relevo xeracional, permitindo que novos músicos se incorporen cada ano ao equipo principal.
“"Estamos moi contentos. É unha alegría moi grande. Para nós significa un orgullo tremendo, un refrendo a moitos anos de traballo que se consuman con este premio."
O éxito de Emocións permitiu que a proposta trascendese as fronteiras de Celanova, levando o legado do autor do Rexurdimento a outros puntos de Galicia. A axenda da banda mantense intensa, combinando estes proxectos de gran formato con actuacións festivas e académicas que manteñen o vínculo coa veciñanza.
