O grupo desprazouse ata A Pontenova para realizar un percorrido de 17 quilómetros que combinou a Ruta dos Fornos, a Ruta do Ferrocarril e a Ruta do Muiñeiro Namorado. A actividade, de dificultade baixa, iniciou o seu percorrido na Praza dos Fornos da Pontenova e rematou en San Tirso de Abres.
Antes de iniciar a andaina, os participantes achegáronse ata a Oficina de Turismo da Pontenova, situada na antiga estación de ferrocarril de Vilaoudriz. Alí, un técnico de Turismo explicou a importancia da industria do ferro no desenvolvemento da localidade, desde a extracción do mineral nas minas ata o seu tratamento nos fornos e o transporte pola antiga vía ferroviaria ata o cargadeiro de Porto Estreito, na ría de Ribadeo.
Ao longo dos 17 quilómetros, os sendeiristas gozaron dunha fermosa paisaxe e coñeceron parte do patrimonio industrial, natural e etnográfico da zona. A xornada estivo marcada por temperaturas agradables, a pesar da previsión de choiva, permitindo desfrutar plenamente da ruta.
