O conselleiro de Emprego, Comercio e Emigración, José González, participou hoxe na inauguración da 26ª edición do Encontro internacional de torneiros da madeira de Xermade. Salientou a traxectoria desta cita, de referencia en Europa, que conta co apoio do Goberno galego desde os seus inicios. O conselleiro agradeceu o labor da Asociación de Amigos da Madeira, impulsora desta iniciativa a prol da difusión e recuperación deste oficio artesanal ligado ao territorio.
Esta entidade contribúe a evolucionar o oficio, xa que con este encontro, que se celebrará desde hoxe ata o domingo, visibilizan a innovación en métodos, técnicas e materiais como vía imprescindible para o seu mantemento e futuro. A programación inclúe demostracións, formación e exposicións da man de profesionais de prestixio de orixe nacional e europea.
Participarán torneiros con dilatada experiencia como Pierre Cornëlis (Francia), Kevin Hutson (Reino Unido), Paulo de Tarso (Portugal) e Lolo Castro (Galicia), considerado un dos mellores artesáns torneiros de madeira de Europa e impulsor do encontro. Ademais, haberá unha exposición de pezas realizadas polos participantes e a mostra itinerante CONtornos, que acada a súa XVII edición.
González tamén subliñou o acompañamento deste encontro co Centro Internacional de Torneiría A Reitoral, situado nunha antiga reitoral rehabilitada en Xermade. Este espazo é un referente na formación, demostración e divulgación do oficio tradicional e levará o nome de Fernando Vérez, en memoria dun dos seus maiores impulsores.
O apoio da Xunta a esta cita enmárcase na aposta autonómica pola artesanía de Galicia, polo seu rol definitorio da idiosincrasia e tradición galegas, e como motor económico no rural e vertebrador do territorio. Destacou o papel da Fundación Artesanía de Galicia e o selo de calidade Artesanía de Galicia.
Referiuse a apoios como os destinados ao fomento da comercialización da artesanía (265.000€ en 2026) e a unha liña específica de 1 M€ dentro da orde de Primeira Experiencia Profesional para incentivar contratos formativos de aprendices en oficios artesanais. Esta aposta está recollida no Plan Estratéxico do Comercio 2025-2030.
O conselleiro lembrou tamén os Premios Artesanía de Galicia, cuxa inscrición está aberta do 21 de setembro ao 1 de outubro. Inclúen o Premio Artesanía de Galicia (9.000 euros), o Premio Traxectoria (honorífico) e as Bolsas Eloy Gesto (ata tres bolsas de 4.000 euros cada unha para formación especializada).
