Aficionados á electrónica, telecomunicacións e software libre terán a oportunidade de coñecer sistemas como LoRa, Mestastic e MeshCore, que permiten crear redes de comunicación entre dispositivos sen depender de infraestruturas convencionais.
Estas tecnoloxías, cada vez máis presentes na radioafición, establecen redes en malla (mesh) onde cada aparello actúa como nodo, ampliando o alcance e a resiliencia das comunicacións. Os organizadores sinalan que abren novas posibilidades para redes locais de longo alcance e baixo consumo enerxético.
A xornada, organizada pola Unión de Radioaficionados Españoles de Lugo (Urel), a Unión de Radioaficionados da Terra Chá (Uretc) e a Ure Costa Lucense, terá lugar no salón de actos do Consello regulador da DOP Queixo San Simón da Costa.
A participación é gratuíta ata completar aforo e desenvolverase de 17.00 a 19.00 horas. Recoméndase realizar inscrición previa chamando ao teléfono 630.05.45.17.
