As altas temperaturas, que rozan os 30 graos, acompañan a un novo incendio forestal declarado na parroquia de Xermar, no concello de Cospeito. O lume iniciouse pasados uns minutos das 16:00 horas.
A situación complicouse unha hora despois, cando as chamas saltaron a estrada LU-1706, o que obrigou a cortala ao tráfico. Existe preocupación pola proximidade do incendio á planta de biocompost, onde se atopan cinco traballadores nestes momentos.
Aínda que o centro de coordinación da Xunta non puido ofrecer datos sobre a superficie afectada, xa se desprazaron ao lugar tres axentes, seis brigadas, tres motobombas, dous helicópteros e dous avións para intentar controlar e extinguir as chamas canto antes. Segundo as indicacións, non hai vivendas próximas á zona.
