O emblemático lago das Pontes foi o epicentro do I Triatlón Lago de As Pontes, unha competición que atraeu a case 400 participantes. Os deportistas mediron forzas en dúas modalidades: media distancia, cun percorrido total de 84,3 quilómetros, e distancia olímpica, de 35,3 quilómetros. Ambas as probas disputáronse en categorías masculina, feminina e de relevos.
Na media distancia, Marcos Ruíz Brague alzouse coa vitoria masculina cun tempo de catro horas e 57 segundos. Superou a Pablo López e Ramón Troncoso por marxes de máis de catro e seis minutos, respectivamente. Na categoría feminina, Tereza Ctvrtnickova impúxose cun crono de seis horas e 50 segundos, seguida por Mirian Maceira e Paula Taboada.
En canto á distancia olímpica, Emilio Tizón Valverde foi o gañador masculino cun tempo de unha hora, 52 minutos e doce segundos. Ainoa Gontán Iglesias logrou a primeira praza feminina ao cruzar a meta en dúas horas, catro minutos e 27 segundos. Completaron o podio masculino Jacobo Crego e Alberto Tomé, mentres que no feminino fixeron o propio Mirian Trigo e Iria Fernández.
Na modalidade de relevos, o equipo La cuarta del Abente (David, Alejandro e David) impúxose na media distancia. O segundo posto foi para Tríatlon Vilalba (Noelia, Marcos e Roberto), e o terceiro para Triatlón Ferrol (Pablo, José Antonio e Mario). Na distancia olímpica, a vitoria foi para De Chill (Alvaro, Andrés e Héitor), seguidos por Los Ocupados (Fernando, Pablo e Manuel) e Tríatlon Vilalba (Eva, Gonzalo e José Luis).
Este evento, organizado polo club TriArteixo–AceadeAma coa colaboración da Federación Galega de Tríatlon e Péntatlon Moderno, o Concello das Pontes, a Deputación da Coruña e a Xunta, nace "con vocación de continuidade e coa vontade de consolidar o lago como escenario de referencia para o tríatlon en Galicia". Javier Mon, da organización, agradeceu o apoio institucional e o traballo da Policía Local e Protección Civil, destacando a implicación de case cen persoas para garantir o desenvolvemento da proba nun "entorno único".
