A conselleira de Política Social e Igualdade, Fabiola García, visitou este martes a nova escola infantil municipal de Begonte, que desde o pasado mes de setembro ofrece atención educativa totalmente gratuíta. Esta gratuidade é posible grazas ao programa impulsado pola Xunta de Galicia.
Durante a visita, García salientou que se trata dun centro moderno e completamente equipado, que dispón de 36 prazas públicas para nenos de 0 a 3 anos. O Goberno galego realizou un investimento de 278.000 euros, procedentes de fondos europeos, para a posta en marcha desta infraestrutura.
“"Actualmente están cubertas 22 prazas pero para o curso que vén xa contamos encher e incluso xa estamos plantexando e falaremos coa conselleira para ampliar para chegar ás 45 prazas."
A conselleira agradeceu o esforzo do concello por promover este servizo, que evita que as familias teñan que desprazarse para levar os seus fillos á escola infantil. Ademais, subliñou que iniciativas coma esta consolidan a posición de liderado de Galicia na taxa de escolarización no primeiro ciclo de educación infantil, achegándose xa ao 65%, o que representa 15 puntos por riba da media estatal.
Fabiola García recordou que a gratuidade das escolas infantís é unha realidade en toda Galicia, un obxectivo ao que o Executivo autonómico destina 68 millóns de euros anuais de fondos propios.
