Ante o interese e a preocupación xerados entre a veciñanza, o Concello de Abadín quixo explicar a súa posición respecto ao proxecto de implantación dunha planta de biogás no municipio. A entidade local asegura que a súa "prioridade" é "a defensa do interese xeral de Abadín".
Os representantes públicos sinalan que teñen a "obriga de tratar este asunto con responsabilidade, rigor e transparencia, afastándonos tanto do alarmismo como da banalización". Lembrouse que proxectos deste tipo poden supoñer oportunidades "en materia de valorización de residuos e de produción de enerxías renovables", pero "só poderá ser valorado favorablemente se acredita todas as garantías técnicas, ambientais, sanitarias e legais esixibles".
O Concello incide en que a súa postura non se pode basear en "especulacións", senón en "informes técnicos" e o "estrito cumprimento da normativa vixente". Defenden a súa independencia e aseguran que velarán pola transparencia, o acceso á información e o correcto tratamento das alegacións presentadas.
Ademais, apuntan que se lle esixirá a calquera proxecto que queira implantarse a protección da saúde pública, a correcta xestión de olores, emisións e residuos, a preservación dos recursos naturais, a compatibilidade coa actividade agroganadera, a seguridade ante un posible incremento do tráfico e o cumprimento das distintas normativas aplicables.
