Como cada último fin de semana de abril, o centro urbano da Feira do Monte transformarase nun gran recinto feiral para recibir a máis dun centenar de expositores. Este evento, que se consolida como un referente na comarca, combina a exposición de maquinaria agrícola de segunda man coa mostra de produtos artesanais e pezas de anticuario.
“"Unha feira con 35 anos de historia non necesita moita presentación."
A presentación da cita contou coa presenza de diversas autoridades locais, que destacaron a importancia da feira como «memoria viva» da localidade, subliñando a súa continuidade cunha tradición arraigada que se reflicte incluso no topónimo da capitalidade municipal. O cartel anunciador deste ano, deseñado por Paula Francos, rende homenaxe ao pasado do evento, recuperando ilustracións de tractores antigos que xa formaron parte das primeiras edicións.
O recinto feiral, que se estenderá por máis de 30.000 metros cadrados, contará con preto de cincuenta postos de artesanía e uns vinte e cinco anticuarios. A organización do evento, que conta co apoio da Xunta de Galicia e Caixa Rural, agradeceu a colaboración de expositores, voluntarios e persoal municipal, así como a todos os visitantes que se acheguen a gozar da ampla programación.
A programación inclúe a apertura do recinto feiral o sábado 25 ás 10:00 horas, seguida da inauguración oficial ás 12:00 horas. Durante a xornada haberá pasarrúas a cargo de Asubíiños da Chaira e Charanga DGT, ademais de cantos de taberna. O domingo 26, a V Festa da Música ofrecerá actuacións de Asubíiños da Chaira e a asociación cultural Buxainas de Cedeira, antes do peche do recinto ás 20:30 horas.
