O investimento deste ano, procedente do Fondo de Compensación Ambiental, centrouse na posta en valor da contorna da Presa de Leira, coa recuperación do acueduto situado nos límites das parroquias de Ribela, Parada e Codeseda. Este conxunto hidrolóxico e arquitectónico é considerado un importante elemento patrimonial e un atractivo turístico aínda descoñecido.
O alcalde estradense, Gonzalo Louzao Dono, visitou a zona para coñecer o resultado dos traballos, destacando o "atractivo natural, hidrolóxico e turístico" do conxunto e o "patrimonio tan interesante" da zona.
Na primeira intervención, realizada en 2024, o Concello xa recuperara os muros da presa e instalara pasarelas e varandas para facilitar o tránsito peonil. Neste 2026, o foco púxose na recuperación do acueduto, recuperando algunhas das grandes lousas de pedra que cobren a canle e restituíndo parte da súa configuración orixinal. A infraestrutura, concibida para a condución de auga, ten preto de tres séculos de historia, datando a súa construción algunhas fontes documentais no ano 1753.
O acueduto de Leira forma parte dunha antiga condución de auga duns 3 quilómetros de lonxitude, creada para a rega de prados e cultivos. Ademais da súa importancia arquitectónica, destaca a beleza da paisaxe natural e as lendas populares asociadas a figuras mitolóxicas como os mouros, que deixaron o seu nome en pedras e cavidades da contorna.
