O conselleiro de Presidencia, Xustiza e Deportes, Diego Calvo, acompañado polo xerente da Axencia Galega de Emerxencias (Axega), Marcos Araújo, asistiu a unha demostración do funcionamento dos novos medios tecnolóxicos destinados ao Grupo de Apoio Loxístico (GALI) da Axega. Estes equipos, un dron subacuático e un robot de intervención con control remoto, foron adquiridos ao abeiro do proxecto Atempo.
Esta nova dotación, financiada polo programa Interreg POCTEP 2021-2027, reforza as capacidades operativas dos servizos de emerxencias para actuar en contornas complexas. O dron subacuático pode realizar buscas en augas interiores de ata 300 metros de profundidade e dispón dun brazo articulado para a recuperación ou manipulación de obxectos. O robot de intervención, pola súa banda, está deseñado para reforzar a resposta en tarefas de extinción de incendios e rescate en zonas de difícil acceso.
O dron subacuático é un sistema versátil preparado para integrar novos sensores e tecnoloxías, o que permitirá ampliar as súas funcionalidades. Poderá empregarse na localización de persoas e na busca de obxectos relacionados con investigacións, baixo a coordinación da Garda Civil ou da Policía Nacional.
O robot de intervención reforza a actuación da Axega en incendios e emerxencias en contornas hostís ou de difícil acceso. Pode realizar tarefas de extinción, obter visión do espazo afectado e colaborar en operacións de rescate, ademais de protexer os equipos de intervención cunha cortina de auga. Está preparado para operar en condicións adversas e desprazarse por pendentes pronunciadas. Futuramente, poderá incorporar un sistema de vídeo en directo.
Esta actuación enmárcase no proxecto Atempo, que busca mellorar a preparación, coordinación e resposta dos servizos de emerxencias mediante novos recursos tecnolóxicos e cooperación transfronteiriza.
