O concello de Forcarei, na provincia de Pontevedra, recibiu unha achega de 14.500 euros da Xunta de Galicia para financiar os seus campamentos de conciliación. Estas axudas forman parte do Plan Corresponsables, cofinanciado polo Ministerio de Igualdade, que busca favorecer a conciliación da vida familiar, persoal e laboral.
O delegado territorial da Xunta en Pontevedra, Pablo Fernández, visitou as instalacións e destacou a importancia destes programas. Segundo Fernández, estas iniciativas ofrecen "alternativas de lecer aos máis pequenos durante a época de vacacións, á vez que se facilita a conciliación familiar".
A nivel autonómico, a Xunta destina este ano 7,4 millóns de euros ao desenvolvemento de programas de conciliación en toda Galicia. Deles, 6,5 millóns van para iniciativas municipais, 600.000 euros para actividades de ANPAS e 300.000 euros para proxectos de entidades sociais.
Na provincia de Pontevedra, preto de 30 concellos resultaron beneficiarios destas axudas, cun investimento total que rolda o millón de euros. Estas achegas permiten aos concellos implementar ou mellorar servizos como o coidado de menores en espazos públicos, campamentos, programas de madrugadores, obradoiros lúdicos e actividades culturais, que fomentan ademais a socialización infantil.
