O alcalde da Estrada, Gonzalo Louzao, e o concelleiro de Sanidade e Turismo, Óscar Rancaño, presentaron a programación municipal con motivo do eclipse solar total do vindeiro 12 de agosto. Galicia converterase nun dos mellores lugares para contemplar este fenómeno astronómico excepcional.
O punto de observación elixido polo Concello da Estrada é o Alto do Castro, na parroquia de San Miguel de Castro. Espérase que a actividade comece a sentirse neste emprazamento, considerado privilexiado para a observación, a partir das 18:30 horas.
Para garantir unha observación segura e facilitar o acceso, o dispositivo contará cun operativo especial coordinado coa Policía Local e Emerxencias da Estrada.
O Concello repartirá 1.000 gafas homologadas para a observación solar, facilitadas pola Deputación Pontevedra, entre as persoas asistentes que non leven as súas. A entrega realizarase ata esgotar existencias.
A fase máxima do eclipse producirase ao fío das 20:29 horas, momento no que o ceo escurecerá durante uns instantes, permitindo contemplar a coroa solar, sempre que as condicións meteorolóxicas sexan favorables.
Lémbrase a importancia de nunca mirar directamente ao Sol sen protección homologada. As gafas de sol convencionais, cristais afumados ou calquera outro método caseiro non protexen a vista e poden causar lesións oculares irreversibles.
O Concello da Estrada anima á veciñanza e ás persoas visitantes a achegarse ao Alto do Castro para vivir este evento único con todas as garantías de seguridade.
