O proxecto Sarria ACENDIDA, impulsado polo Concello de Sarria e cofinanciado pola Vicepresidencia da Deputación de Lugo con 50.000 euros, desenvolverase entre setembro e decembro cunha programación diversa que abarca música, memoria, arte, artes escénicas, oficios, oralidade, fotografía e gastronomía.
A iniciativa busca recuperar e poñer en valor historias, palabras, saberes e formas de vida do rural, adaptándoas a novos formatos e espazos. A programación arrincará os días 4, 5 e 6 de setembro coa celebración da Liga Nacional de Graffiti na zona deportiva de Sarria.
Durante tres xornadas, dez artistas profesionais crearán en directo dez murais de gran formato, que se integrarán de forma permanente no espazo público da vila. As obras xirarán arredor de cinco liñas temáticas: as aldeas e as súas formas de vida, a lingua galega, os oficios tradicionais, o papel das mulleres e a transmisión da memoria, e a música e a festa.
O venres 4 e o sábado 5, os artistas traballarán nos murais en horario de mañá e tarde, acompañados de sesións de DJ. O sábado tamén se impartirá un obradoiro infantil de graffiti gratuíto para nenos e nenas de 7 a 12 anos, con inscricións a través das redes sociais do Concello. O domingo 6, ás 12.00 horas, terá lugar a entrega de premios e a presentación pública dos murais.
Tras a fin de semana dedicada á arte urbana, Sarria ACENDIDA continuará co teatro en setembro e outubro. Durante outubro e novembro organizaranse obradoiros sobre memoria das aldeas, oficios tradicionais, oralidade, fotografía, vídeo, cociña e receitas tradicionais, co obxectivo de construír un arquivo vivo da memoria rural.
O proxecto culminará o 12 de decembro na Praza de Abastos cunha celebración final que reunirá asociacións, música e unha mostra dos resultados xerados. O Concello de Sarria informará progresivamente dos detalles de cada actividade e dos procesos de inscrición.
