A celebración da Noite Meiga 2026 en Sarria xa comezou coas accións nos comercios locais e a entrega de pulseiras conmemorativas. Inaugurouse tamén a mostra "O Eco das Meigas. Memoria Viva" na Antiga Prisión Preventiva.
Os actos centrais da festa de fin de verán inícianse este venres coa Tardiña Meiga e a tradicional Andaina, que partirá dende La Unión ata o Parque do Chanto. A programación completa está dispoñible en liña e nas redes sociais de Meigas e Trasgos.
Grazas á declaración da Noite Meiga como Festa de Interese Turístico e ao apoio económico da Xunta de Galicia (a través de Galicia Calidade e o Xacobeo 2027), á Deputación de Lugo e a Abanca, o Concello puido investir en melloras significativas na produción da danza. Estas novidades prometen un salto de calidade e espectacularidade respecto a edicións anteriores.
O Concello convida a veciños e visitantes a gozar dunha noite que se prevé máxica e irrepetible, desexando que "as Meigas e os Trasgos vos acompañen".
