A mostra, promovida pola Vicepresidencia da Deputación e a Rede Museística, poderá visitarse durante un mes na explanada da piscina climatizada de Sarria. As imaxes céntranse en nenos, nenas e adolescentes que manteñen o galego como lingua maioritaria, a pesar do contexto de perda de falantes.
Nas fotografías combínanse elementos simbólicos que fan referencia a figuras destacadas no uso do galego, así como palabras relacionadas con afectos, natureza ou fenómenos atmosféricos, co obxectivo de chamar a atención das xeracións máis novas.
“"Interpelar ás xeracións máis novas para frear a perda de falantes. Lanzar esta mensaxe desde a rúa, en espazos informais e de socialización, como fai esta exposición, é unha oportunidade para conectar con esas novas xeracións."
Na inauguración participaron, ademais da autora, o vicepresidente da Deputación, Efrén Castro; os concelleiros de Cultura, César No, e Educación, Geni Valcárcel; e a edila do BNG, Mónica López. Castro subliñou a importancia de dirixirse á mocidade para frear a diminución de falantes, destacando o valor da exposición ao situarse en espazos públicos e informais para conectar con eles.
A exposición está situada a pé de rúa co fin de acadar a máxima difusión posible entre a cidadanía, especialmente entre os máis novos, segundo indicaron dende a Vicepresidencia.
