O director da Axencia para a Modernización Tecnolóxica de Galicia (AMTEGA), Damián Rey, participou hoxe na recepción de participantes na misión inversa sobre GovTech: Innovación, seguridade e cooperación, organizada polo Clúster TIC de Galicia co apoio do IGAPE.
A delegación está composta por 14 responsables de goberno dixital, organismos públicos de innovación, investimento e regulación, así como por directivos de operadores de telecomunicacións procedentes de Arxentina, Uruguai, Panamá e Guatemala.
Damián Rey subliñou a relevancia da soberanía dixital e a concentración de coñecemento para adaptar a transformación dixital ás particularidades de Galicia. Destacou a colaboración entre a Administración, universidades, centros de investigación e a industria, mencionando como exemplo o Pacto Dixital de Galicia, que integra a 19 grandes empresas tecnolóxicas e clústeres empresariais da comunidade.
A misión inversa do Clúster TIC de Galicia, que inclúe encontros en Santiago de Compostela, continuará durante esta semana en Vigo e A Coruña.
