A conselleira do Mar, Marta Villaverde, inaugurou en Santiago de Compostela a xornada que pecha o proxecto de cooperación Pesca Saúde, promovido por sete grupos de acción local do sector pesqueiro e coordinado polo GALP Costa Sostible. Villaverde sinalou que "cando apoiamos o consumo do produto pesqueiro local tamén estamos coidando da nosa saúde, protexendo a nosa cultura mariñeira e garantindo o futuro deste sector e do noso litoral".
Lembrou que o consumo de produtos do mar en Galicia ascende a máis de 23 quilos por persoa e ano, cinco quilos por riba da media estatal, e engadiu que "debemos seguir traballando para reverter a tendencia xeral á baixa".
A conselleira agradeceu a cooperación dos sete GALP e a colaboración da Consellería de Sanidade, destacando as xornadas divulgativas e iniciativas móbiles como a FoodBike nos centros de saúde. As demostracións de cociña nas prazas de abastos reuniron máis de 300 persoas e amosaron receitas sinxelas para preparar peixe e marisco na casa.
A campaña contou coa adhesión de 117 peixerías e outros establecementos de venda, onde se distribuíron vales de desconto e se organizaron sorteos. Tamén se incluíron obradoiros para planificar as compras e preparar menús semanais. Nos restaurantes do litoral, a campaña Come o mar, come saúde promoveu menús con especies locais e de tempada co asesoramento de profesionais da nutrición.
Na xornada de peche, a xerente do GALP Costa Sostible, Manuela Oviedo, presentou os resultados da iniciativa, que incluíu unha guía de propiedades nutricionais e o Receitario Pesca Saúde. Interviron tamén o cardiólogo Guillermo Aldama, o xerente da ACERGA, Manuel Suárez, e o cociñeiro Lolo Mosteiro.
O proxecto, desenvolvido en 2025 e 2026, contou coa participación dos GALP Costa Sostible, Ría de Vigo-A Guarda, Costa da Morte, Ría de Pontevedra, Golfo Ártabro Sur, Ría de Arousa e A Mariña-Ortegal, e co financiamento da Consellería do Mar e do Fondo Europeo.




