A Cátedra, orixinada por un convenio asinado en agosto de 2026 entre a USC, a Axencia de Turismo de Galicia e a Catedral de Santiago, celebrou a súa traxectoria cunha presentación de actividades para o vindeiro ano. O director da Cátedra, o profesor Miguel Vázquez Taín, destacou "unha década de traballo no que se consolidaron numerosas actividades que axudaron a un maior coñecemento da temática xacobea dende a rigorosidade da investigación científica". Na presentación tamén participaron a reitora da USC, Rosa M. Crujeiras; o director da Fundación Catedral de Santiago, Daniel Lorenzo; e o director de Turismo de Galicia, Xosé Manuel Merelles.
A reitora Rosa M. Crujeiras cualificou a Cátedra como "un excelente exemplo de como institucións con misións e competencias diferentes poden sumar esforzos arredor dun obxectivo común, relevante e estratéxico para Galicia". Subliñou que é "un proxecto compartido que sitúa no centro do seu labor o estudo, a investigación, a divulgación e a valorización dun dos nosos maiores patrimonios: o Camiño de Santiago e todo o universo cultural, histórico, social e espiritual que o rodea". Tamén lembrou a recente concesión á Cátedra do Premio Internacional Pentafinium Jacobeo.
De cara ao 2027, Ano Santo Xacobeo, Vázquez Taín anunciou novas convocatorias internacionais de axudas para proxectos de investigación (dotadas con 4.000 euros cada unha), o Premio de Investigación sobre o Camiño de Santiago e das peregrinacións (3.000 euros), e premios para TFG e TFM (1.000 euros cada un) para traballos con máxima cualificación.
Os proxectos financiados e investigadores galardoados presentaranse nas Leccións Xacobeas Internacionais da USC, que celebran o seu 20 aniversario no Museo das Peregrinacións durante as festas do Apóstolo. A Cátedra tamén continuará coa organización de dous cursos en liña masivos e abertos (MOOCs) en colaboración con EUniwell, un sobre topografía xacobea de Santiago de Compostela e outro sobre a proxección internacional do Camiño e a hospitalidade.
Como novidade, o 15 de xaneiro abrirase o prazo para o I premio aos mellores vídeos do estudantado da USC sobre pezas culturais ou histórico-artísticas emblemáticas do Camiño de Santiago, dotados con 500 euros cada un. O director da Fundación Catedral de Santiago, Daniel Lorenzo, puxo en valor "a rigorosidade e a solidez" do labor da Cátedra, mentres que o director de Turismo de Galicia, Xosé Manuel Merelles, cualificouna como "ferramenta indispensable" e avanzou a renovación do convenio en 2027.
