Froito do traballo intensivo, xurdiron 6 iniciativas en formato startup que serán propostas ao Climate KIC para a súa posible selección na competición internacional que este organismo organiza anualmente. Estas propostas buscan abordar desafíos ambientais e sociais a través de solucións innovadoras.
As ideas do estudantado abranguen desde a creación dunha rede para conectar produtores locais con consumidores de produtos ecolóxicos, fomentando o emprego e a comercialización de produtos de calidade, ata o deseño dun plan integral de autosuficiencia enerxética para unha aldea ou un sistema de autoabastecemento de auga para a produción agraria mediante novas tecnoloxías. Outras propostas inclúen a reinvención dunha panadería tradicional para mellorar a súa eficiencia enerxética e económica, a revitalización dunha iniciativa cultural rural con novas actividades, e a ordenación territorial para potenciar a produción forestal e a protección fronte a fenómenos meteorolóxicos adversos e incendios.
O profesor Antonio García Loureiro, Coordinador do MERYCSE, destacou a importancia do traballo en grupo e a colaboración entre estudantes de diferentes niveis formativos. "Unha mostra clara de que o traballo entre diferentes espazos formativos non só é posible, senón que é tremendamente enriquecedora e marcan un camiño de futuro a seguir moi prometedor", afirmou.
Os organizadores do CLIMATHON foron invitados a presentar as conclusións deste evento nas xornadas que organiza a Alianza Galega polo Clima da Xunta de Galicia en conmemoración do Día Internacional contra o Cambio Climático.
Esta iniciativa climática foi organizada polo Máster de Excelencia en Enerxías Renovables, Cambio Climático e Desenvolvemento Sostible da USC (MERYCSE), co apoio da Consellaría de Medio Ambiente e Cambio Climático da Xunta de Galicia. Colaboraron tamén a Facultade de Bioloxía, a Biorrexión Cantábrica, a Consellaría de Educación, Ciencia, Universidades e Formación Profesional, o Máster Universitario en Biodiversidade Terrestre da USC e os CIFP Ferrolterra e Valentín Paz Andrade.
